1Cor 12 | GAM | STEP | Agana kambono, God Murble nono wal wopake aundo mal, ye pille kune yene dje pille na ipon kandja dje ye aundo.

1 Corinthians 12

God Murble nono wal wopake aundo mal

1 Agana kambono, God Murble nono wal wopake aundo mal, ye pille kune yene dje pille na ipon kandja dje ye aundo. 2 Ye kaninj, asa ye orko to moi poke, wal ta wo ye ipo god kende lotu yenj al worika, ye lotu ye awi ba god kende moi ge olup nayei, gun namoi. 3 Ye embe yei pille, God wal dje wordo mal, na ye kanpol tane dje pille djindo. God Murble una boll moi dal, una ge mangal to Jisas aune kondwe nayenda. Alla, God Murble una boll namoi dal, ga Jisas Iwa Kerman moro we djine kondwe nayenda.

4 God Murble wal kayekaye aundo ba God Murble kayekaye namor, God Murble taimane moro. 5 Alla, una kogo kayekaye ye Iwa Kerman aune ba, Iwa Kerman kayekaye ta namor, Iwa Kerman taimane moro. 6 Una God taimane pille kogo kayekaye yene kune yenda, ba God taimane aundo mal pille kogo yene. 7 Nono pillgi djipin una taimane taimane dje mormon ge, God Murble nono wopake mopon dje pille wal wopake aundo.

8 God Murble una pende wal wopake aunda, una ge nomane wopake pandaka, kandja dje una aune. Alla una pende God Murble wal wopake aundaka, una ge nomane kerman pandaka kandja dje una aune. 9 Alla una pende moye al wal wopake aundaka, una ge pillgi dongall djine. Una pende moye al wal wopake aundaka, una ge po ke panda una moye al ye wopake ye auneke, kiwa moye. 10 Una pende moye al wal wopake aundaka ga po kogo dongall yene. Una pende moye al wal wopake aundaka, una ge po propet kandja djinj mal ge, God kandjiye dje una aune. Una pende moye al wal wopake aundaka, una ge wal pille kune yene, una God Murble boll kandja djinj mo, yenekne nomane boll kandja djinj mo, una ge kane kune yene. Una pende moye al wal wopake aundaka, una kandja djell ta djinj mal embe dje aune. Alla una kandja embe djine ge, God Murble wal wopake aundaka, una pende pille kune ye, kandja kep ye una aune. 11 Wal wopake aundo ge, God Murble taimane ge aundo. Yene nomane taimane paro mal pille una taimane taimane dje mor al wal wopake aundo.

Iwa Kerman gakle kerker paro ge nono mormon

12 Una gaklene al kakene aglene merke paro ba, gaklene taimane paro. Paro mal, Krais gakle embe paro. 13 God Murble nono porapora i nu pagle awika, nono Iwa Kerman gakle taimane mal embe mormon. Juda una morka, pende epil djell una morka, una pende ge una boll kaye pa nukogo yenjka, una pende kiwa morka, embe djelldjell mopin ba nono ipin ge God Murble taimane ge ipin.

14 Nono kanmon, una gaklene paro ge taimane paro, kakene aglene ge merke paro ba una gaklene ge taimane paro. 15 Kakene ge kandja embe djinda, aglene paro mal ge na embe namoro pille, na gaklene al pakna namoyo. Une kandja embe djinda ba ge kune nayenda. Une gaklene al paknato moro. 16 Kamalne ge kandja embe djinda, nalene paro mal ge na embe namoro pille, na gaklena al pakna namoyo. Une kandja embe djinda ba ge kune nayenda. Une gaklene al pakna moro. 17 Gaklene porapora nalene klo pi dal, kandja namba mal piye? Gaklene porapora kamalne klo pi dal, mirang namba mal piye? 18 Man, kune nayenda. Kakene aglene porapora gaklene al paro ge, God dji mal paro. 19 Kakene taimane yene moya, mo aglene taimane yene moya ge, ge gaklene kaima man. 20 Gaklene taimane paro we djinmon ba, kakene aglene merke paro.

21 Nalene soka kandja embe djimbell, ye aglene soka kogone naparo, er pise! djimbell ba kune nayenda. Alla, ngambalne kandja embe djinda, ye kakene soka kogone naparo, er pise! djinda ba kune nayenda. 22 Man, kakene aglene merke ge, pende yembene naparo, kogo nayenj dje kanmon ba, yenekne kogone kerman paro. 23 Pende kane wopake nakanmon ba kantau wopake yenmon. Pende kane ngandjill gormon ba, nono konkunom woro to bi dongall djinmon. 24 Pende embe nayenmon. Ba God una gaklene beke yei ge une taimane beki. Alla, una kakene aglene kane wopake nayenj al ge, une pille pla yendo. 25 God embe yendo pille, kakene aglene djelldjell namor. Ta ye molo ta kantau yendaka ta ye molo ta kantau yenda. Embe ye molo yenekne kantau wopake ye kune yenj. 26 Kakene aglene taimanta imb kakda ge, ga porapora imb kakne. Taiman ta kandjiye kerman inda ge, ga porapora une boll wo piye.

27 Ye porapora mor ge, ye Krais gakle mor. Alla ye taimane taimane dje mor ge, une kake agle mal embe molo kogo yenj. 28 Krais gakle al mormon ge, God dje wori, nono yene kogoye yenmon. Asamoll une dje wori una aposel mor, are ge una propet mor, are ge una beke awinj una mor, are ge una kogo dongall yenj una mor, are ge una ke to parka una wo i gun worinj una mor, are ge una pak to una awinj una mor, are ge una boll kantau yenj una mor, are ge una kandjane djell ta djinj una mor. 29 Ye porapora mor ge, aposel namor. Ye porapora propet namor. Ye porapora beke awinj una namor. Ye porapora kogo dongall yenj una namor, 30 una ke to parka ye porapora i gun woro awinj una namor. Porapora una kandjine djell ta nadij, mo ta djine ge ye porapora kandja kep yene kune nayendo. 31 Man, God Murble wal wekle pundo wal aundo ge, ye embe imbon dje pille pla yene. Ba alla ipon wal wopake uro kaima paro mal ge na ye djina piye.